خمس سنوات

لبغداد ... من قلبي سلام لبغداد

.

بدون تعليق

1

رسالة لأحد المصريين العباقرة علي شريط رسائل قناة النيل للرياضة : 6\10 = 10\2 بالنسبالي كمصري واحد

2

المالكي يدعو أردوجان إلى احترام سيادة الأراضي العراقية

3

قال مصدر رسمي عراقي أن القضاء أصدر حكما بالإعدام على ستمائة شخص وصفوا بالإرهابيين بعد إدانتهم بقتل الكفاءات العلمية في العراق.
وأوضح المتحدث الرسمي باسم وزارة الداخلية اللواء عبد الكريم خلف في تصريحات صحفية أنه تم تنفيذ الحكم فعليا بحق مائتين منهم حتى الآن.

4

مصرع فتاة مصرية عمرها 14 سنة برصاص قوات اسرائيلية علي الحدود المصرية إثر اطلاق نار من الجانب الإسرائيلي حيث إنطلقت رصاصة من برج مراقبة إسرائيلى إلى رأس الفتاة.
يذكر أن ابن عم الفتاة قد توفي في وقت سابق الشهر الماضي برصاص القوات الاسرائيلية.

تعليق بسيط : فين بقي البطل الهمام اللي كان بيهدد بكسر الارجل والعظام وصاحب الرؤية التحليلية للصراع الكاريكاتوري ... أكيد محدش هيسمعلك صوت دلوقتي يا سيادة الوزير الشجاع
وعلي فكرة الخبر في القنوات المصرية كان بيعدي علي شريط الاخبار بحيث يوهم أن مصدرالرصاص مجهول .. يعني حتي
الخبر مش عايزيين يقولوه صح

5

أتهم الرئيس الفلسطيني محمود عباس حماس بالمسؤولية عن «إدخال» تنظيم القاعدة إلي غزة، معربا عن اعتقاده بوجود «تحالف» بين الطرفين

6

في حوالي أربعة أيام فقط أستشهد أكثر من ستين (أصبحوا بنهاية يوم السبت ثمانيين) فلسطيني نسبة كبيرة منهم من الاطفال ...
ورغم ذلك فالعالم العربي في غيبوبة غريبة

7
Ben Gurion : If Israel loses one war it will be the end.
بن غوريون : إسرائيل تخسر حرب واحدة اذا فهي النهاية
.

تقاطع الحمير

حد سمع قبل كده عن مبدأ تقاطع الحمير

بجد مش تهريج ... ده مبدأ محسوس حولنا في حجات كتير

علي العموم ده مبدأ أفتكرته (أو بمعني أصح افتكسته ) لما شوقت الكاريكاتير ده من جرنان المستقبل اللبناني

أنا بقالي بصراحة فترة كبيرة محتار من المالكي ده ازاي شغال لامريكا ولايران في نفس الوقت
عنده مثلا انفصام شخصية
ولا نظام العملاء المزدوجيين بتوع المخابرات

لحد ما الكاريكاتير ده انقذني ونبهني لحاجة

انه حتي ولو كان فيه كيانات سياسية متصادمة ... فأكيد نفس الكيانات ديه بينها ولو يعني شكل أو أخر من أشكال تقاطع المصالح

وفي الحالة اللي احنا امامها فان نقطة التقاطع ممثلة في نوري المالكي هيا بلد بحاله
بلد امبراطورية التدمير الامريكية لغت اسمه من علي الخريطة ومسحت باستيكه حضارته وتاريخه... وفي نفس الوقت ده اعطي فرصة كبيرة لعدو امريكا اللدود ايران للتغلغل في كل نواحي الحياه في البلد المنتهي لدرجة ان فيه اماكن في العراق أصبحت لدرجة ما تابعة اداريا لايران.

العراق دلوقتي بقي عبارة عن شاي بلبن أمريكي ايراني والحمد لله
والعرب نايمين في غيبوبة..

والغريب ان نفس الكيانين دول داخلين في صراع حقيقي (مش تقاطع مصالح ) في حاجة تانية والعرب للاسف داخلين فيه ( فايقين هنا نايمين هناك )

فالعرب مع انهم سايبين ايران في العراق... تلاقي امريكا بتوزهم ضد ايران وتخوفهم من مشروعها النووي

وكأن امريكا بتقول للعرب :
سيبوا ايران وملكوش دعوه بيها في العراق اهو بتكمل معايا تدمير البلد عشان نجيبه علي البلاط في أقرب وقت ممكن
وبستك عليها في حكاية الملف النووي لحسن حبيبتكوا وحبيبة الملايين اسرائيل قلقانة شويه فياريت تساعدوها ينبكوا ثواب

كان المفروض الرسام رسم بدل الحماران وحشان كان هيبقي الرسم أكثر واقعية

And here is the rest of it.

الجزيرة من تحت لتحت

انهارده كنت بتفرج علي التليفزيون جبت علي الحرة الامريكانية لاقيت برنامج بيتكلم عن الارهاب والقاعدة واستخدام الانترنت

المهم كان فيه ضيف من بغداد وواحد من مصر اللي من مصر كانوا كاتبين انه خبير في الجماعات الارهابية (مش عارف هي ايه موضة خبير في الارهاب اللي طالعيين فيها اليوميين دول زي سنترالات المحمول لما كان كل واحد مش لاقي شغله يفتحلة محل للموبايل)اا

المذيع كان بيسئلهم عن القنوات التلفزيونية التي تذيع لقطات الفيديو التي تجئ من العراق وهل ده يعتبر شئ أخلاقي أم لا
طبعا بقليل من الذكاء تفهم انهم بيتكلموا عن الجزيرة
المهم الراجل اللي من مصر لاقيته بيقول ان ده شئ غير مقبول بل غير أخلاقي لانهم بيذيعوا مشاهد قتل الابرياء
انا بصراحة عمري ما شفت الجزيرة بتذيع حاجة غير العمليات المصورة للمقاومة العراقية ضد الامريكان
(بل حتي هيا لاتذيع اي مقاطع فيديو لعمليات ضد الشرطة أو الجيش العراقي)اا
1) فهل يا تري عمنا الحلو ده كان يقصد بكلمة الابرياء حبايبنا الامريكان اللي بتستهدفهم المقاومة
يا حرام صعبنين عليه قوي كده
2) أو هوا ما بيتفرجش علي الجزيرة أساسا
3)أو كان بيجامل الامريكان ويسميهم ابرياء علشان القناة أمريكية فمش معقول يشتمهم في بيتهم
والراجل اللي في بغداد قال ده كده بيبثوا الفتنة الطائفية مش فاهم ازاي يعني لما انا احارب الهمج اللي احتلوا بلدي واصور العمليات اللي بعملها ضدهم ابقي ببث الفتنة الطائفية ازاي

بعد كده المذيع سئلهم ازاي قناة فضائية (يقصد الجزيرة ) تعمل منتدي الناس فيه عمال يكتبوا كلام طائفي خصوصا ان المنتدي ده بكتب فيه مذيع واعلاميين من نفس القناة قصده علي موقع الجزيرة تاك
الحقيقة الراجل عنده حق فعلا المنتدي الناس فيه طائفية جامدة
ناس بيحبوا الحزب الاسلامي يشتموا في القاعدة واللي بيحب القاعدة يرد
ناس يشتموا في حماس وناس يشتموا في فتح
وناس يشتموا في الشيعة وحوارات كده
بس الموقع مكتوب فيه ان ما يوجد به لا يعبر عن شبكة الجزيرة
الموقع موقع شبابي خالص الشباب بيكتبوا فيه تقارير كل واحد من البلد اللي عايش فيها وفيه جزء منتدي للحوار بين الاعضاء المشتركينن
وطبعا كل واحد بيكتباللي علي باله
وانا اساسا لغاية دلوقتي مش عارف الموقع تبع مين ولا بتاع مين وهل الجزيرة هيا اللي بترعاه

المهم اكتشفت ان البرنامج اللي المفروض يتكلم عن القاعدة حوالي نص او تلت وقته كان بيتكلم عن الجزيرة(دون ذكر أسماء طبعا)اا

القناة ديه حرقاهم في ايه مش عارف

القناة في رأيي ممتازة الا أن بها بعض العيوب
مثلا بعض المذيعيين احيانا يكونوا غير محايدين وياخدوا جانب محدد
غالبا بيكون جانب الجماهير وما يعتقدوه الا انني لا اري ذلك مبررا للتخلي عن الحيادية
مثل تاني حوار الجزيرة تاك ده اللي ملهوش لزمة يكون فيه منتدي
ما النت مليانة منتديات أشكال والوان ايه فايدته واحد تاني
(ده طبعا اذا كانت هيا اللي عاملاه)

وطبعا فيه عيوب تانية بس في الاخر لا تؤثر في مكانة القناة التي أصبحت رائدة في الاعلام العربي

بيقولوا القاعدة في مصر

بالصدفة وجدت علي موقع الجزيرة خبر عن اعتقال 35 شخص في مصر المحبوسة (المحروسة ) يشتبه في انتماءهم لتنظيم القاعدة وذلك في شهر أبريل
وأن هناك حالة ااستنفار اأمني كبير وملحوظ خاصة في محطات مترو الأنفاق والأماكن السياحية والمصالح الحكومي

قلت في بالي اتاري المترو اول امبارح لما خرجت كان متعبي شرطة والجو متكهرب شويه.

لقيت برضه علي موقع المصريون خبر مكتوب فيه تعليق ل ضياء رشوان الخبير في شئون الجماعات الإسلامية :
إن هناك عوامل مثيرة للشكوك حول الإعلان عن اعتقال المجموعة المزعوم صلتها بـ "القاعدة"؛ أهمها عدم الإعلان عنه على لسان مصدر رسمي حتى الآن، وعدم نشره في جريدة قومية.
وأوضح أن ما يدعو أيضًا للشكوك هو الادعاء بوجود صلة بين أفراد المجموعة و"الجيش الإسلامي" بالعراق والربط بين هذا التنظيم الخليط من بعثيين وإسلاميين و"القاعدة" رغم أنه من ألد أعدائها، بل أنه أعلن إخلاء منطقة العامرية في العراق من مقاتلي التنظيم بعد معارك دموية.

بصراحة نادر لما الواحد ممكن يصدق الكلام ده و الحوار اما بيكون انذار كاذب أو ركوب لموجة الارهاب اللي في العالم.

وكمان أزاي يكون المتهمين ممسكوين في شهر أبريل وما حسيناش بالستنفار ده الا في شهر يوليو.

بس في نفس مش شايف ان الحكاية فيها ضرر مدام الامن هيفتح عينه اكتر ماهي مفتوحة ومنفنجلة بس المهم يعاملوا البني ادمين اللي ماشيين في الشوارع كويس.

أجمل شهر في العراق

قال المتحدث باسم خطة أمن بغداد العميد قاسم عطا أن هناك انخفاض في عدد المدنيين الذين قضوا في أعمال عنف في العراق خلال يونيو/حزيران الماضي بحوالي 37% مقارنة بالشهر الذي سبقه. وحسب تلك المصادر فقد قتل 1241 مدنيا خلال الشهر المنصرم في حين سجل خلال شهر مايو/أيار السابق مقتل 1951 مدنيا

تعليقي

والله تقدم ملحوظ في سير العملية الديموقراطية العراقية المهلبية علي الطريقة الامريكية
فقد قتل في شهر واحد الف ومائتي شخص فقط
ده حتي الواحد سعات بيحس ان الارقام ديه بتتكلم عن كتاكيت فطست من الحر مش عن بني ادمين لحم ودم

وعلي رأي فرقة دام :
ديمقراطية.والله مو قضية. من كتر ما اغتصبتوا النفس العرب