Sunday, October 7, 2007

كانوا ... وكانوا ... وأصبحوا

في 67 كانوا قاعدين بيسمعوا الست علي الراديو

في 73 كانوا بيقولوا الله أكبر وهما شايلين سلاحهم


تحديث
بعد ما كان عنوان التدوينة كانوا وكانوا .... قلت أعمله كانوا وكانوا وأصبحوا وذلك لوصف حالنا اليوم

و في وصف حالنا اليوم لا أعتقد أن هناك وصف أبلغ من هذه الكلمات للاعلامي غسان بن جدو والتي أفتتح بها هذه الحلقة من برنامج حوار مفتوح
وكان عنوان الحلقة : النظرة إلى إسرائيل بين 1973 و 2007

هنا

أو


.

Friday, October 5, 2007

أفتح يا وليد .. ده رئيس الوزرااا


افتح يا وليد
افتح يا وليد ده رئيس الوزاا
يا ولاااااد ال .....

قالها ضابط الشرطة العسكرية اللي كان واقف جنبي ( أو اللي كنت واقف جنبه )في جهاز اللاسلكي وانا واقف بتفرج علي الجنازة اللي كانت في مسجد القوات المسلحة انهارده


And here is the rest of it.

Wednesday, September 26, 2007

رئيس لزقة

حد عمره شاف رخامة ولزقة زي كده

الراجل الغريب بتاع باكستان ده تنح قوي


قرأت في موقع البي بي سي الخبر ده عنه :
أبلغ المدعي العام الباكستاني مالك محمد قيوم المحكمة العليا بباكستان بأن الرئيس برفيز مشرف سيحتفظ بقيادة الجيش إذا لم يتم انتخابه لولاية رئاسية جديدة.

يعني انا قاعد علي قلبكوا و قلب اللي خلفوكوا يا شعب ويا انا يا انتوا

فحتي لو انتخبتونيش ريس انا وراكوا وراكوا ومش هسيب رياسة الجيش عشان اعمل انقلاب عسكري تاني علي الرئيس اللي هتنتخبوه

فكرني بالمواقف الطفولية لما العيال الصغيرة مترضاش تخلي واد ما بتحبوش تلعب معاها ...فيقوم هوا ببلطجة يقول...هلعب يمافيش لعب

نفس الحكاية .... كأنه بيقول لشعبه : هحكم يمافيش حكم

زعماء أخر زمن


ملحوظة : عنوان التدوينة كان رئيس بالعافية .. بس خفت لحسن الالف واللام ما يتشافوش واتاخد في أبو نيكلة بتهمة الاضرار بلاقتصاد والبورصة وتشويه سمعة مصر ومساعدة الهكسكوس في دخول مصر

تحديث : من موقع قناة الجزيرة 28/09/2007
سمحت المحكمة الباكستانية العليا للرئيس برويز مشرف بخوض انتخابات الرئاسة المقررة الشهر المقبل مع احتفاظه بمنصبه قائدا للجيش، في إجراء يمثل صفعة للمعارضة الباكستانية الساعية لمنعه من الفوز بولاية ثانية

تحديث : من موقع قناة الجزيرة 02/10/2007
عين مشرف قائد المخابرات السابق أشفق كياني خليفة له في قيادة الجيش، في حالة فوزه بالانتخابات الرئاسية المقرر إجراؤها السبت المقبل.
وقال مسؤول بالجيش إن الجنرال أشفق كياني عين نائبا لرئيس هيئة الأركان بالجيش، مضيفا أنه "سيتولى منصب رئيس هيئة الأركان إذا أصبح هذا المنصب شاغرا".



ايه ده يا جدعان هيا لعبة الكراسي الموسيقية ولا ايه

تقاطع الحمير

حد سمع قبل كده عن مبدأ تقاطع الحمير

بجد مش تهريج ... ده مبدأ محسوس حولنا في حجات كتير

علي العموم ده مبدأ أفتكرته (أو بمعني أصح افتكسته ) لما شوقت الكاريكاتير ده من جرنان المستقبل اللبناني



أنا بقالي بصراحة فترة كبيرة محتار من المالكي ده ازاي شغال لامريكا ولايران في نفس الوقت
عنده مثلا انفصام شخصية
ولا نظام العملاء المزدوجيين بتوع المخابرات

لحد ما الكاريكاتير ده انقذني ونبهني لحاجة

انه حتي ولو كان فيه كيانات سياسية متصادمة ... فأكيد نفس الكيانات ديه بينها ولو يعني شكل أو أخر من أشكال تقاطع المصالح

وفي الحالة اللي احنا امامها فان نقطة التقاطع ممثلة في نوري المالكي هيا بلد بحاله
بلد امبراطورية التدمير الامريكية لغت اسمه من علي الخريطة ومسحت باستيكه حضارته وتاريخه... وفي نفس الوقت ده اعطي فرصة كبيرة لعدو امريكا اللدود ايران للتغلغل في كل نواحي الحياه في البلد المنتهي لدرجة ان فيه اماكن في العراق أصبحت لدرجة ما تابعة اداريا لايران.

العراق دلوقتي بقي عبارة عن شاي بلبن أمريكي ايراني والحمد لله
والعرب نايمين في غيبوبة..

والغريب ان نفس الكيانين دول داخلين في صراع حقيقي (مش تقاطع مصالح ) في حاجة تانية والعرب للاسف داخلين فيه ( فايقين هنا نايمين هناك )

فالعرب مع انهم سايبين ايران في العراق... تلاقي امريكا بتوزهم ضد ايران وتخوفهم من مشروعها النووي

وكأن امريكا بتقول للعرب :
سيبوا ايران وملكوش دعوه بيها في العراق اهو بتكمل معايا تدمير البلد عشان نجيبه علي البلاط في أقرب وقت ممكن
وبستك عليها في حكاية الملف النووي لحسن حبيبتكوا وحبيبة الملايين اسرائيل قلقانة شويه فياريت تساعدوها ينبكوا ثواب

كان المفروض الرسام رسم بدل الحماران وحشان كان هيبقي الرسم أكثر واقعية

And here is the rest of it.

Tuesday, September 25, 2007

اضرابات × اضرابات


هيا البلد بيحصل فيها ايه


video



بالصدفة (بما اني مش متابع اليومين دول اي اخبار سواء في مصر او بره) لاقيت علي الجزيرة تقرير عن عودة الاضرابات في مصانع المحلة وان العمال المرة ديه استولوا علي مصنع ومش ناويين يفكوا الاضراب الا ما يخدوا حقهم.

المهم قعدت ادور علي الحكاية ايه الخبر
علي الجزيرة علي العربية علي المصريين

المهم أنا مش عايز انقل خبر وخلاص
هوا فيه كذا حاجة لاحظتها


اكتر حاجة يمكن شدتني في الكلام اللي قرأته تصريح لوزير الاستثمار بيقول ايه «لن يحصل عامل علي حقه بلي الذراع»ا

طيب يسعادة حضرته البيه اديك قولتها بلسانك .....حقه

يعني الناس ديه عايزها حقها وبس مش بلطجية يعني

وكمان يعني هو النظام ما سبش للناس غير الطريقة ديه عشان تاخد حقها

يعني لو ما عملوش كده ...والله ولا حد هيسأل فيهم ولا هيعبروهم

وكمان علي فرض ان اللي العمال بيعملوه اسموه بلطجية

ما أعتقدش أنه حاجه من أختراعهم ..لا ده منتج حكومي وليه حقوق ملكية كمان

يعني اللي بيته من ازاز ما يحدفش الناس بالزلط.


حاجة تانية

دخلت علي الاخبار أشوف الجرايد بتاعة الحكومة ديه بتكتب ايه عن الحوار ده لاقيت في وشيي الخبر ده.

يعني زي ما كنت متوقع ان الاقيها كاتبه

الاقتصاد ميت فل وعشرة..... وكله تمام والامن مستتب ....والاصلاحات شغالة
حتي شوفوا البنك الدولي الطيب اللي كل همه انه يساعد الدول الصغيرة والفقيرة ومش بيحاول يساعد أمريكا والغرب في الهيمنة علي الشعوب ...هوا نفسه بيقول كده.


حاجة تالته

بالصدفه برضه لقيت علي موقع الاهرام الخبر ده

لا بجد الراجل يشكر ... باله مشغول بالبلد وشئونها حتي الرياضه

بس هل يا تري عمل حاجة للناس اللي معتصمين دول بالالوف وبيقولوا انهم مش لاقيين يأكلوا ولادهم.

حد هيرد عليا ويقول : لا يا عم الحج اكيد عمل دا قلبه كبير ويساع ملايين .. عيب عليك.

والله اتمني يكون كده فعلا


Thursday, September 6, 2007

الي أرض الطمانينة و الراحة


أنا مسافر ان شاء الله السعوديه لاداء العمرة شكلي مش هلحق رمضان في مكة .. بس ان شاء الله هقعد اكتر من يوم في المدينة
ربنا يسهل ويوعد الجميع بالرحلة الايمانيه .....

Monday, August 20, 2007

الجيش اللبناني


امبارح كان فيه خير كده ان الجيش اللبناني استخدم قنابل وزنها 400 كيلوجرام لقذف مواقع فتح الاسلام

الخبر استغربت منه في عدة اوجهه
ازاي جماعة مكونة من 100 ولا 200 واحد ..جيش نظامي مش قادر عليها من يجي كام شهر ..حتي لو الجيش ده قدراته محدوده

حاجة تانية اهم استغربتلها ..وهو ان القنابل وطيارات الهليكوبتر ديه كانت فين السنة اللي فاتت لما جيش الكيان السرطاني كان بيدمر لبنان

وافتكرت تقرير شوفته علي اليوتيوب متسجل من قناة نيوتيفي (اللي اكيد تبع حزب او تيار في لبنان زي اي قناة عندهم) التقرير بيتكلم عن جنود لبنانيين بيقدموا القهوة للجنود الاسرائيليين ايام الحرب



بس برضه انا فاكر في ايام الحرب لما الواحد قعد التلاتين يوم دول ادام الدش يتابع الحرب ...كان فيه شهداء كتير من الجيش اللبناني..

يعني مش معني كلامي اللي فات اني بقول ان الجيش اللبناني عميل او ملهوش لزمة ...
بس هيا مجرد افكار جت في دماغي

Sunday, August 19, 2007

محمد زيدان في هامبورج

دلوقتي فيه ماتش بين هامبورج وليفركوزن في الدوري الالماني

ومحمد زيدان بيلعب اساسي

بصراحة ما فيش وقت احط صورة ليه عشان دا خلاص الماتش شكله بدأ

سلالالالالالالالالام

Thursday, August 16, 2007

أسئلة في السريع ؟؟؟؟؟؟؟


كام سؤال كده سؤال في السريع :

هوا رجل الشرطة اللي بيكون حاطط تلات شرط ده رتبته ايه ؟؟؟؟؟؟
اصل كنت بعمل جواز سفر وكان فيه واحد زيه كده شايف نفسه قوي وعمال يكلم الناس اللي بتعمل جوازات بطريقه مش حلوه مع انهم ناس شكلهم يقول انهم محترمين يعني ممكن يكون منهم دكتور ولا استاذ جامعي ولا مهندس ولا تربوي ولا اي حاجة ...مش سوابق يعني
يعني المفروض حتي لو لواء يكلم الناس بطريقة كويسه - اعتقد دا الحال في اي بلد محترم -
لا وايه مع ان المكان مغلق بس ماسك السجارة وشغال قشطة
يا عم الحج المفروض انك بتطبق القانون ولا بتخالفه؟؟؟؟؟ - ده سؤال ثااني-

سؤال ثالث :
هوا كل واحد في ام البلد ديه بيمشي شغله المسئول عته بمذاج اللي خلفوه ولا ايه ؟؟؟؟

من فترة كنت روحت القسم اجيب استمارة عمل جواز السفر
لاقيت الست المتوظفة بتقوللي وهيا بتكلمني بقرف كده : انت لازم يكون ورقك جاهز الاول
قولتها : ازاي وانا واخد لوالدتي استمارة من المدام اللي جانبك امبارح من غير ما تقوللي الورق جاهز
قالت : انا بمشي شغلي كده وعايزاك تطلع بره ( بنت ال ...)ا
انا بصراحة قلت يمكن فعلا هوا النظام كده والمدام التانية المفروض ما كانتش تديني الاستمارة كده قبل ما الورق يكون كامل

انهارده بقي رحت مجرد ما قلت لضابط او امين شرطة محترم كده واقف انا عايز استمارة لجواز السفر اداني الاستمارة علطول ولا فين ورقك ولا حاجة

يعني من الاخر في البلد ديه مصالح الناس بتمشي بمزاج اللي ماسكها وانت ولا عارف ايه النظام ولا مين الشغال مظبوط ومين لا

عشان بس ما كونش بعمم اكيد في كل مكان فيه ناس محترمين بيقوموا بشغلهم كويس من غير ما يطلعوا عين الناس

Saturday, August 11, 2007

تصويت عن التعذيب في مصر


لاقيت تصويت في الجزيرة عن التعذيب في مصر قولت اعمل هنا برضه واحد زيه بالظبط عشان أعرف رأيكوا

أنا بصراحة ابصم بالعشرين صابع ان التعذيب منهجي ومنظم

لدرجة انه يمكن أصبح علامة جودة لمصر أو رمز وطني زي الاهرامات

في انتظار تصويتكم

Thursday, August 2, 2007

العلماني يتكلم

.
أجزاء من حلقة لبرنامج الاتجاه المعاكس علي قناة الجزيرة تستضيف العلماني سيد القمني والاسلامي هاني السباعي.


الفيديو كنت عامله من حوالي ثلاث أسابيع بس ما كنتش عارف ارفعه .. لكن الحمد لله أخيرا رفعته.

بصراحة انا وضعت اللقطات التي يتكلم فيها سيد القمني فقط ولم أضع أجزاء من كلام هاني السباعي لاني كنت عايز اعمل الفيديو علي كلام العلماني الغير مفهوم علي الاطلاق .
وصراحة هاني السباعي كان أحيانا يتكلم بالفاظ مقززة







أو

هنا


يا ريت يا جماعة اللي يفهم اي حاجة من كلام الراجل ده يقوللي
متهيقللي كلامه ...
اما بيقوله وهوا يقصد من وراءه معني يهاجم به الاسلام بفكره المريض الغبي.
او هوا كلام ليس له معني اساسا واهو هوا بيخبط في الهوا يمكن يقول كلمتان يكون ليهم معني

لمن يريد قراءة نص الحلقة هنا

.

Tuesday, July 31, 2007

استطلاع او استفتاء او اي اسم

لقيت ان بلوجر عملوا خاصية جديدة لعمل الاستفتاءات

قلت اجربه

هتلاقيه علي الجنب

Tuesday, July 24, 2007

ولا مليم والله


بقي اليوم الصبح بفتح التليفزيون الاقي ان ليبيا بسلامتها سابت الممرضات المجرمات وودوهم بلدهم لا وايه بطائرة فرنسية مخصوصة

يخرب بيوتكم انتوا ما عندكوش دم كده خالص والاطفال اللي عماله تموت (50 طفل الي الان ) مين ياخد القصاص من قاتليهم

الاكثر من هذا ان ساركوزي بتاع فرنسا الجديد بيقول يا جدعان ما تخافوش احنا ما دفعناش مليم واحد تعويضات ما تخافوش...معقول نديهم تعويضات اذا كان هما مش عاملين لنفسهم ثمن احنا هنعمل

لا والراجل المتعمر ده عامل فيها قائد الثورة والعقيد القائد والاخ الرفيق
وكل شوية يطلعلنا بحوار متخلف
فترة
دولة اسراطين
وفترة
الدولة الفاطمية الثانية
وفترة
الولايات المتحدة الافريقية


اقرأوا الجزء ده من موقع الجزيرة:
وكان مساعدون لساركوزي ومسؤولون ليبيون قالوا إن باريس ربطت زيارة ليبيا بالإفراج المسبق عن الممرضات والطبيب.

وقد نفى ساركوزي أن تكون فرنسا وأوروبا دفعتا تعويضاً للجماهيرية مقابل تسليم الممرضات البلغاريات والطبيب الفلسطيني الأصل.

لكن وزير الخارجية الليبي قال إن الاتحاد الأوروبي وباريس دفعا كل المبلغ الذي قدمه صندوق بنغازي لمساعدة عائلات الأطفال المصابين بالايدز. وأضاف أن "الاتحاد الأوروبي وفرنسا غطتا كل المبلغ بل هناك زيادة بعض الملايين" بالصندوق.

يعني من الاخر شكل عم معمر شال الموضوع كله وطبعا من فلوس الشعب اللي واكلها

نفسي اصحي في يوم اجد ان كل الرؤساء والزعماء والملوك والقادة واصحاب الجلالة والفخامة والعظمة والجلالة والسمو اللي حاكمين الشعوب العربية خطفيتهم كائنات فضائية تعمل عليهم تجارب بيولوجية كميائية مميتة

قولوا آمين

Sunday, July 22, 2007

العيب في الداخل



بمناسبة البوست اللي كتبته من يومين عن أثيوبيا .. كنت قبلها بيومين اتفرجت علي فيلم اجنبي اسمه شوتر



بيتكلم عن قناص محترف ( بطل الفيلم )فقد صديق له في عملية في اراضي أثيوبيا ..الامر الذي اثر فيه كثيرا وجعله يترك الحخدمة في الجيش
وبعد ثلاق سنوات من الحادث استغل احد الجنرالات حبه بطل الفيلم لوطنه (اللي هوا امريكا طبعا) واقنعه ان يعمل معه علي ابطال عملية متوقعة لاغتيال الرئيس..الامر الذي يتبين بعد ذلك انها عملية لاغتيال رئيس اساقفة أثيوبيا واتهام بطل الفيلم بها.

يلجأ بطل الفيلم الي الهرب حيث يكتشف ان العملية في الاصل كانت مدبرة لتبدو علي انه كان يريد اغتيال الرئيس لكنه فشل واصب رئيس اساقفة أثيوبيا وان السبب هو طمث الحقائق الذي يعرفها رئيس الاساقفة من ان الامريكان ارتكبوا ابادة جماعية في اثيوبيا لمصلحة شركة عملاقة امريكية .

الي هنا واتوقف لان السبب الذي جعلني اتكلم عن هذا الفيلم ان وجدت فيه نفس الفكرة التي أصبحت تتردد في الافلام والمسلسلات الامريكية

وهي فكرة الشركة العملاقة الاخطبوطية الخفية التي تتحكم بطريقة أو بأخري بالسياسة الامريكية وتسيرها في المقام الاول لمصلحة الشركة واستثماراتها حتي ولا كان ذلك علي حساب شعوب أخري بل ولو علي حساب الشعب الامريكي نفسه ....

شركة في مقدورها تحديد من سيتم انتخابه رئيسا لامريكا
شركة ليس لديها خطوط حمراء في مسئلة الاغتيالات والارهاب والقتل

قد يرجع ذلك الي احساس الامريكان (ومنهم منتجي هوليوود ) الي خلل ما يوجد في توجهات سياسة دولتهم
ان كره شعوب الارض لهم لسبب داخلي فيهم

ما يؤكد كلامي أنني وجدت تعليقات الامريكان علي الفيلم توحي أن كلامي الي حد ما صحيح

لكنني صراحة أفكر انه حتي ولو كانت مثل هذه الكيانات الخفية وجود اليس اول شئ يكون في اولوياتها هو التحكم في السينما وللتاكد من عدم احساس المواطن بان سياسات بلاده يتحكم فيها كيانات مالية ضخمة

يمكن يكون التحليل مجرد اوهام لا اساسا لها من الواقع لكنني متاكد من ان جوهر الفكرة صحيح الي مدي معين


Friday, July 20, 2007

الاهلي فاز بالتلاتة يا رجالة

الاهلي فاز علي الترجي تلاتة صفر



الصور من الاستاد فعلا
أصلي كنت هناك

سلالالالالالام بقي
اروح اريح الجثة شوية

الجزيرة من تحت لتحت


انهارده كنت بتفرج علي التليفزيون جبت علي الحرة الامريكانية لاقيت برنامج بيتكلم عن الارهاب والقاعدة واستخدام الانترنت

المهم كان فيه ضيف من بغداد وواحد من مصر اللي من مصر كانوا كاتبين انه خبير في الجماعات الارهابية (مش عارف هي ايه موضة خبير في الارهاب اللي طالعيين فيها اليوميين دول زي سنترالات المحمول لما كان كل واحد مش لاقي شغله يفتحلة محل للموبايل)اا

المذيع كان بيسئلهم عن القنوات التلفزيونية التي تذيع لقطات الفيديو التي تجئ من العراق وهل ده يعتبر شئ أخلاقي أم لا
طبعا بقليل من الذكاء تفهم انهم بيتكلموا عن الجزيرة
المهم الراجل اللي من مصر لاقيته بيقول ان ده شئ غير مقبول بل غير أخلاقي لانهم بيذيعوا مشاهد قتل الابرياء
انا بصراحة عمري ما شفت الجزيرة بتذيع حاجة غير العمليات المصورة للمقاومة العراقية ضد الامريكان
(بل حتي هيا لاتذيع اي مقاطع فيديو لعمليات ضد الشرطة أو الجيش العراقي)اا
1) فهل يا تري عمنا الحلو ده كان يقصد بكلمة الابرياء حبايبنا الامريكان اللي بتستهدفهم المقاومة
يا حرام صعبنين عليه قوي كده
2) أو هوا ما بيتفرجش علي الجزيرة أساسا
3)أو كان بيجامل الامريكان ويسميهم ابرياء علشان القناة أمريكية فمش معقول يشتمهم في بيتهم
والراجل اللي في بغداد قال ده كده بيبثوا الفتنة الطائفية مش فاهم ازاي يعني لما انا احارب الهمج اللي احتلوا بلدي واصور العمليات اللي بعملها ضدهم ابقي ببث الفتنة الطائفية ازاي

بعد كده المذيع سئلهم ازاي قناة فضائية (يقصد الجزيرة ) تعمل منتدي الناس فيه عمال يكتبوا كلام طائفي خصوصا ان المنتدي ده بكتب فيه مذيع واعلاميين من نفس القناة قصده علي موقع الجزيرة تاك
الحقيقة الراجل عنده حق فعلا المنتدي الناس فيه طائفية جامدة
ناس بيحبوا الحزب الاسلامي يشتموا في القاعدة واللي بيحب القاعدة يرد
ناس يشتموا في حماس وناس يشتموا في فتح
وناس يشتموا في الشيعة وحوارات كده
بس الموقع مكتوب فيه ان ما يوجد به لا يعبر عن شبكة الجزيرة
الموقع موقع شبابي خالص الشباب بيكتبوا فيه تقارير كل واحد من البلد اللي عايش فيها وفيه جزء منتدي للحوار بين الاعضاء المشتركينن
وطبعا كل واحد بيكتباللي علي باله
وانا اساسا لغاية دلوقتي مش عارف الموقع تبع مين ولا بتاع مين وهل الجزيرة هيا اللي بترعاه

المهم اكتشفت ان البرنامج اللي المفروض يتكلم عن القاعدة حوالي نص او تلت وقته كان بيتكلم عن الجزيرة(دون ذكر أسماء طبعا)اا

القناة ديه حرقاهم في ايه مش عارف

القناة في رأيي ممتازة الا أن بها بعض العيوب
مثلا بعض المذيعيين احيانا يكونوا غير محايدين وياخدوا جانب محدد
غالبا بيكون جانب الجماهير وما يعتقدوه الا انني لا اري ذلك مبررا للتخلي عن الحيادية
مثل تاني حوار الجزيرة تاك ده اللي ملهوش لزمة يكون فيه منتدي
ما النت مليانة منتديات أشكال والوان ايه فايدته واحد تاني
(ده طبعا اذا كانت هيا اللي عاملاه)

وطبعا فيه عيوب تانية بس في الاخر لا تؤثر في مكانة القناة التي أصبحت رائدة في الاعلام العربي

Thursday, July 19, 2007

مين أولي ؟؟؟؟



في جريدة الاخبار يوم الاثنين 16/7/2007 خبر يقول :

وافق أحمد أبوالغيط وزير الخارجية علي تقديم معونات غذائية من دقيق وقمح وزيت طعام الي اثيوبيا وذلك من الصندوق المصري للتعاون الفني مع افريقيا.. صرح بذلك السفير هشام النقيب مدير الاعلام والدبلوماسية العامة بوزارة الخارجية مشيرا الي ان ذلك يأتي في اطار دعم علاقات الصداقة مع الاشقاء الافارقة


لقيت الخبر برضة علي موقع وزارة الخارجية المصرية

بصراحة استغربت من الخبر وقلت في نفسي اشمعنا أثيوبيا يعني اللي نبعتلها معونات
ديه حتي كانت من شهر ولا شهرين عاملة فيها عنتر ودخلت الصومال كانها وكالة من غير بواب بكام دبابة اللي حيلتها وكام حتيتان الهليكوبتر اللي أعتقد ان كلها من ايام خروتشوف أيام ما كان بيديهم أسلحة وعمرها الافتراضي ودع من زمان

يعني هيا قادرة تعمل حروب وتجتاج دولة جنبها (اللي بالمناسبة دولة عربية في الجامعة العربية ) ومش قادرة تاكل عيالها
نيجي بعد كده نديها مساعدات ازاي
حتي فعلا لو محتاجين المساعدات ديه فاعتقد ان الصوماليين اولي بيها علي اساس أن اثيوبيا هي اللي اجتاحت بلدهم


Sunday, July 15, 2007

بيقولوا القاعدة في مصر


بالصدفة وجدت علي موقع الجزيرة خبر عن اعتقال 35 شخص في مصر المحبوسة (المحروسة ) يشتبه في انتماءهم لتنظيم القاعدة وذلك في شهر أبريل
وأن هناك حالة ااستنفار اأمني كبير وملحوظ خاصة في محطات مترو الأنفاق والأماكن السياحية والمصالح الحكومي

قلت في بالي اتاري المترو اول امبارح لما خرجت كان متعبي شرطة والجو متكهرب شويه.

لقيت برضه علي موقع المصريون خبر مكتوب فيه تعليق ل ضياء رشوان الخبير في شئون الجماعات الإسلامية :
إن هناك عوامل مثيرة للشكوك حول الإعلان عن اعتقال المجموعة المزعوم صلتها بـ "القاعدة"؛ أهمها عدم الإعلان عنه على لسان مصدر رسمي حتى الآن، وعدم نشره في جريدة قومية.
وأوضح أن ما يدعو أيضًا للشكوك هو الادعاء بوجود صلة بين أفراد المجموعة و"الجيش الإسلامي" بالعراق والربط بين هذا التنظيم الخليط من بعثيين وإسلاميين و"القاعدة" رغم أنه من ألد أعدائها، بل أنه أعلن إخلاء منطقة العامرية في العراق من مقاتلي التنظيم بعد معارك دموية.

بصراحة نادر لما الواحد ممكن يصدق الكلام ده و الحوار اما بيكون انذار كاذب أو ركوب لموجة الارهاب اللي في العالم.

وكمان أزاي يكون المتهمين ممسكوين في شهر أبريل وما حسيناش بالستنفار ده الا في شهر يوليو.

بس في نفس مش شايف ان الحكاية فيها ضرر مدام الامن هيفتح عينه اكتر ماهي مفتوحة ومنفنجلة بس المهم يعاملوا البني ادمين اللي ماشيين في الشوارع كويس.

Sunday, July 8, 2007

مقلب ب700 ميجا


بما اني من محبي الفرجة علي متشات التنس

وبما ان الجزيرة الرياضية خزلتني ولم تنقل بطولة ويمبلدون احد بطولات الجراند سلام

قلت انزل الماتشات من علي النت

دخلت الموقع الرسمي للبطولة ووجدت مكان لتحميل الماتشات كاملة

وفعلا ابديت انزل ماتش اكيد كان جامد .... روجيه × سافين

المهم بعد عناء سبمعمائة ميجا بشغل الميديا بلاير لاقيته بيطللعلي نافذة بتطلب كلمة السر

أول مرة اعرف ان فيه ملفات ميديا بتتقفل بكلمات سر .....سبحان الله

لكل محبي أفلام مايكل مور



ستعرض قناة دبي وان الليلة فيلم بعنوان (روجر اند مي) وهو أول فيلم لمخرج الافلام الوثائقية الشهير مايكل مور

الفيلم علي حسب ما فهمت من الاعلان في القناة يتكلم عن تسريح الاف الموظفين من شركة جنرال موتورز مما ادي الي أضرار كبيرة لكثير من العائلات

الفيلم من انتاج العام 1989


Movie trailer


أتمني انه يكون فيلم جيد مثل فيلمه فهرنايت 9\11
خصوصا ان فيلمه الجديد (سيكو) مكسر الدنيا في أمريكا وعمل الي الان حوالي 12 مليون دولار في شباك التذاكر الأمريكية.

الفيلم يذاع الساعة يوم الاحد 12 ليلا بتوقيت القاهرة


أجمل شهر في العراق

قال المتحدث باسم خطة أمن بغداد العميد قاسم عطا أن هناك انخفاض في عدد المدنيين الذين قضوا في أعمال عنف في العراق خلال يونيو/حزيران الماضي بحوالي 37% مقارنة بالشهر الذي سبقه. وحسب تلك المصادر فقد قتل 1241 مدنيا خلال الشهر المنصرم في حين سجل خلال شهر مايو/أيار السابق مقتل 1951 مدنيا

تعليقي

والله تقدم ملحوظ في سير العملية الديموقراطية العراقية المهلبية علي الطريقة الامريكية
فقد قتل في شهر واحد الف ومائتي شخص فقط
ده حتي الواحد سعات بيحس ان الارقام ديه بتتكلم عن كتاكيت فطست من الحر مش عن بني ادمين لحم ودم

وعلي رأي فرقة دام :
ديمقراطية.والله مو قضية. من كتر ما اغتصبتوا النفس العرب