Tuesday, September 25, 2007

اضرابات × اضرابات


هيا البلد بيحصل فيها ايه


video



بالصدفة (بما اني مش متابع اليومين دول اي اخبار سواء في مصر او بره) لاقيت علي الجزيرة تقرير عن عودة الاضرابات في مصانع المحلة وان العمال المرة ديه استولوا علي مصنع ومش ناويين يفكوا الاضراب الا ما يخدوا حقهم.

المهم قعدت ادور علي الحكاية ايه الخبر
علي الجزيرة علي العربية علي المصريين

المهم أنا مش عايز انقل خبر وخلاص
هوا فيه كذا حاجة لاحظتها


اكتر حاجة يمكن شدتني في الكلام اللي قرأته تصريح لوزير الاستثمار بيقول ايه «لن يحصل عامل علي حقه بلي الذراع»ا

طيب يسعادة حضرته البيه اديك قولتها بلسانك .....حقه

يعني الناس ديه عايزها حقها وبس مش بلطجية يعني

وكمان يعني هو النظام ما سبش للناس غير الطريقة ديه عشان تاخد حقها

يعني لو ما عملوش كده ...والله ولا حد هيسأل فيهم ولا هيعبروهم

وكمان علي فرض ان اللي العمال بيعملوه اسموه بلطجية

ما أعتقدش أنه حاجه من أختراعهم ..لا ده منتج حكومي وليه حقوق ملكية كمان

يعني اللي بيته من ازاز ما يحدفش الناس بالزلط.


حاجة تانية

دخلت علي الاخبار أشوف الجرايد بتاعة الحكومة ديه بتكتب ايه عن الحوار ده لاقيت في وشيي الخبر ده.

يعني زي ما كنت متوقع ان الاقيها كاتبه

الاقتصاد ميت فل وعشرة..... وكله تمام والامن مستتب ....والاصلاحات شغالة
حتي شوفوا البنك الدولي الطيب اللي كل همه انه يساعد الدول الصغيرة والفقيرة ومش بيحاول يساعد أمريكا والغرب في الهيمنة علي الشعوب ...هوا نفسه بيقول كده.


حاجة تالته

بالصدفه برضه لقيت علي موقع الاهرام الخبر ده

لا بجد الراجل يشكر ... باله مشغول بالبلد وشئونها حتي الرياضه

بس هل يا تري عمل حاجة للناس اللي معتصمين دول بالالوف وبيقولوا انهم مش لاقيين يأكلوا ولادهم.

حد هيرد عليا ويقول : لا يا عم الحج اكيد عمل دا قلبه كبير ويساع ملايين .. عيب عليك.

والله اتمني يكون كده فعلا


4 comments:

dr_drsh said...

لي ذراع؟ الهي يرزقه باللي يلوي رقبته , الدول المتحضرة بتتعامل مع الاضراب على أساس ان في حاجة غلط و لازم تتصلح و عندنا بنتعامل معاه كأنه ثورة عبيد, هنضربهم الأول عشان على رأي كمال الشناوي
"الحكومة ملهاش دراع عشان يتلوي"

النسبة لموضوع الرئيس مبارك يتصل ببعثة الأهلي فانا مش عارف ليه بعد ما الـ "شائعات" بتاعات موت الرئيس ما ظهرت لاحظت الأخبار دي كترت , مرة الرئيس يزور عمال مصنع ايه , ومرة الرئيس يسلم أهالي سوهاج مش عارف ايه و مرة الرئيس يحضر مش عارف ايه, يعني تلاقي ديما كده بشكل يومي خبر خفيف عن نشاط رئاسي , معرفش بقى هل ده من باب اللي على راسه بطحة ولا فعلا الرئيس عمل الحاجات دي كلها.

وكده كده انت عارف يعني , الصحافة الوطنية يعني , لا تتوقع ان نظامهم يتغيير, يعني انت مثلا كنت متوقع الأهرام تنزل بخبر "العمال يضربون ووزير الاستثمار يهدد و يتوعد"؟ ,اذا جابو سيرة الخبر ده ففي الأعلب هيجيبو حد من النقابة يقولك اللي حصل ده خروج على الخلق السوي و اساءة لمصر و عمال مصر ولابد أن يعاقب كل المدانين في هذا الاضراب.

ربنا ينصرهم و يوصلهم حقوقهم , قادر يا كريم.

قليل من التفكير said...


مصطفي بيه ازي سعادتك

حلوة قوي الجملة بتاعة كمال الشناوي ديه

بالعكس بقي كل ما كان النظام شمولي وديكتاتوري أكيد دراعاته بتكتر عشان يضرب معارضيه.....فبالتالي وسائل الضغط عليه كتير

ربنا يا رب ينصرهم

Anonymous said...

Enta ghetet. When you post a comment in somebody's blog try to be nice hah?

قليل من التفكير said...


شكرا لاخلاقك الجميلة
بس انت مين

وانهي تعليق او تدوينة اللي بتتكلم عليها