Tuesday, July 24, 2007

ولا مليم والله


بقي اليوم الصبح بفتح التليفزيون الاقي ان ليبيا بسلامتها سابت الممرضات المجرمات وودوهم بلدهم لا وايه بطائرة فرنسية مخصوصة

يخرب بيوتكم انتوا ما عندكوش دم كده خالص والاطفال اللي عماله تموت (50 طفل الي الان ) مين ياخد القصاص من قاتليهم

الاكثر من هذا ان ساركوزي بتاع فرنسا الجديد بيقول يا جدعان ما تخافوش احنا ما دفعناش مليم واحد تعويضات ما تخافوش...معقول نديهم تعويضات اذا كان هما مش عاملين لنفسهم ثمن احنا هنعمل

لا والراجل المتعمر ده عامل فيها قائد الثورة والعقيد القائد والاخ الرفيق
وكل شوية يطلعلنا بحوار متخلف
فترة
دولة اسراطين
وفترة
الدولة الفاطمية الثانية
وفترة
الولايات المتحدة الافريقية


اقرأوا الجزء ده من موقع الجزيرة:
وكان مساعدون لساركوزي ومسؤولون ليبيون قالوا إن باريس ربطت زيارة ليبيا بالإفراج المسبق عن الممرضات والطبيب.

وقد نفى ساركوزي أن تكون فرنسا وأوروبا دفعتا تعويضاً للجماهيرية مقابل تسليم الممرضات البلغاريات والطبيب الفلسطيني الأصل.

لكن وزير الخارجية الليبي قال إن الاتحاد الأوروبي وباريس دفعا كل المبلغ الذي قدمه صندوق بنغازي لمساعدة عائلات الأطفال المصابين بالايدز. وأضاف أن "الاتحاد الأوروبي وفرنسا غطتا كل المبلغ بل هناك زيادة بعض الملايين" بالصندوق.

يعني من الاخر شكل عم معمر شال الموضوع كله وطبعا من فلوس الشعب اللي واكلها

نفسي اصحي في يوم اجد ان كل الرؤساء والزعماء والملوك والقادة واصحاب الجلالة والفخامة والعظمة والجلالة والسمو اللي حاكمين الشعوب العربية خطفيتهم كائنات فضائية تعمل عليهم تجارب بيولوجية كميائية مميتة

قولوا آمين

5 comments:

dr_drsh said...

آمين

micheal said...

اااااااااااااااااه.../تفكرنيش...أنا كنت حتنقط و أنا بقرأ أهرام الامس و اليوم عن الخبر ده...دي العقوبه كانت اعدام في الاول و بعدين خفضوها لمؤبد و الواحد كان زعلان..دلوقتي براءه
تغتكر لو كان ممرضات ليبيات هما اللي عملوا كده في أطفال بلغار كان جري ايه
علي العموم أحييك علي هذا البوست الجميل اللي كنت بفكر أكتب واحد زيه عن هذا الموضوع الممستفز بس خلاص كفايه كده
تحياتي لك

قليل من التفكير said...

تحياتي انا ايضا لك مايكل

وتعقيبا علي كلامك :تلاحظ ان في الاخبار ان الكلام علي ان ليبيا رجعتهم بلدهم عشان يقضوا العقوبة هناك لكن بمجرد ما نزلوا من الطيارة في بلدهم الريس عندهم أفرج عنه..يعني الحوار مفقوس اوي

أنا حر said...

امين طبعا بس والله حرام عليك ايه ذنب الكائنات الفضائية تنقلها كل اللي تعبنا احنا حتى محتارين الناس دي لما تموت ندفنها ولا نحرقها ولا نغرقها وده طبعا خوفا على تلوث التربة والهواء والبحر
ربنا يرزقهم بنفس الاتوبيس السياحي بتاع عادل امام علشان احنا بجد تعبنا خالص
تحياتي ليك

قليل من التفكير said...

أنا حر تحياتي لك

ما هو عشان حكاية تلوث التربة انا بتمني ان الكائنات الفضائية هي اللي تخلص العملية ..أكيد هما متقدمين عن الانس وعندهم وسائل للتخلص من مصادر التلوث..

:) :) :) :)