Wednesday, September 26, 2007

رئيس لزقة

حد عمره شاف رخامة ولزقة زي كده

الراجل الغريب بتاع باكستان ده تنح قوي


قرأت في موقع البي بي سي الخبر ده عنه :
أبلغ المدعي العام الباكستاني مالك محمد قيوم المحكمة العليا بباكستان بأن الرئيس برفيز مشرف سيحتفظ بقيادة الجيش إذا لم يتم انتخابه لولاية رئاسية جديدة.

يعني انا قاعد علي قلبكوا و قلب اللي خلفوكوا يا شعب ويا انا يا انتوا

فحتي لو انتخبتونيش ريس انا وراكوا وراكوا ومش هسيب رياسة الجيش عشان اعمل انقلاب عسكري تاني علي الرئيس اللي هتنتخبوه

فكرني بالمواقف الطفولية لما العيال الصغيرة مترضاش تخلي واد ما بتحبوش تلعب معاها ...فيقوم هوا ببلطجة يقول...هلعب يمافيش لعب

نفس الحكاية .... كأنه بيقول لشعبه : هحكم يمافيش حكم

زعماء أخر زمن


ملحوظة : عنوان التدوينة كان رئيس بالعافية .. بس خفت لحسن الالف واللام ما يتشافوش واتاخد في أبو نيكلة بتهمة الاضرار بلاقتصاد والبورصة وتشويه سمعة مصر ومساعدة الهكسكوس في دخول مصر

تحديث : من موقع قناة الجزيرة 28/09/2007
سمحت المحكمة الباكستانية العليا للرئيس برويز مشرف بخوض انتخابات الرئاسة المقررة الشهر المقبل مع احتفاظه بمنصبه قائدا للجيش، في إجراء يمثل صفعة للمعارضة الباكستانية الساعية لمنعه من الفوز بولاية ثانية

تحديث : من موقع قناة الجزيرة 02/10/2007
عين مشرف قائد المخابرات السابق أشفق كياني خليفة له في قيادة الجيش، في حالة فوزه بالانتخابات الرئاسية المقرر إجراؤها السبت المقبل.
وقال مسؤول بالجيش إن الجنرال أشفق كياني عين نائبا لرئيس هيئة الأركان بالجيش، مضيفا أنه "سيتولى منصب رئيس هيئة الأركان إذا أصبح هذا المنصب شاغرا".



ايه ده يا جدعان هيا لعبة الكراسي الموسيقية ولا ايه

19 comments:

أنا حر said...

كده الاسم احسن لأنه بيناسب ويتعايش مع واقعنا المصري أكتر
رئيسنا ناصح هو الرئيس والمالك لكل شيء في البلد يعني مفيش مفر ان حد يترشح غيره
يارب ... انت العالم انا عايز ادعي واقول ايه على مين
تحياتي

قليل من التفكير said...


أنا حر
أهلا بك في المدونة

بما أن أنا عارف أنت عايز تقول ايه وتدعي علي مين

فهرد عليك بكلمة واحدة
آمين

yasmina said...

فعلا كلامك صحيح
يتصرفون كالاطفال

micheal said...

ههههههههه...يا عم مشرف ده أطيب من غيره بكتيير
تحياتي
و كل سنه و أنت طيب

قليل من التفكير said...


ياسمينا أهلا بيكي في المدونة

هما بتصرفوا زي الاطفال بس قهرهم للشعوب شيطاني

قليل من التفكير said...


أهلا مايكل

وانت طيب يا باشا

ايوه فهلا هوا أطيب من غيره من زمايله القمعيين

ما الديكتاتورية وقمع الشعوب ليها درجات ومراتب

وحبه بحبه هيتعملها جوايز ومهرجانات

Hossam Sadik said...

على فكره الراجل ده انا بعزه قوى .. بس لو ماعملش كده كنت هاحس ان فيه حاجه غلط .. ديه دول رجعية وغير ديمقراطية بالمرة .. ماسمعوش عن حاجه اسمها القائد الأعلى للقوات المسلحة!!, بدل مايقعدوا يتخانقوا كده ودول العالم تشمت فيهم.. أخص عليهم

yomna said...

مع انى كنت عاوزة اكتب في الموضوع ده بس انت سبقتني و عملت السبق...يلا بقى تتعوض قريب

اما بقى الراجل ده فهو متبت في الكرسي و مش عاوز يسيبه بيفكرني بواحد صاحبنا
تعرفه؟؟

انا بقى معرفوش...اصلي عاوزة اربي العيال

قليل من التفكير said...


حسام صادق
أهلا بزيارتك الاولي في المدونة

فعلا دول بالطريقة ديه هتفضل زي ماهيا متأخرة مدام شخصيات متخلفة بتمسك الحكم فيها

قليل من التفكير said...


موني
أهلا بكي في تاني زيارة للمدونة

ولا سبق ولا حاجة
بس هوا الراجل ده خانقني من فترة وكنت عايز اعمل عنه تدوينه

وأنا مش شايف حاجة ان الواحد يكون هيكتب موضوع ولقي واحد كاتب عنه...بصراحة مش شايف مانع انه يكتب هوا كمان في نفس الموضوع ..لان كل واحد له طريقة تفكير وتعابير مختلفة..

أما بقي حكاية ان الناس ديه متبتة في الكرسي زي واحد صحبنا
...فأكيد فيه تفسير علمي للحكاية ديه

اكيد الكراسي فيه حاجة ... والا كانوا سابوها من زمان

اسامة يس said...

كلهم على نفس الشاكلة .... الشرق الاستبدادي ....

قليل من التفكير said...


أسامة
أهلا بزيارتك للمدونة

فعلا تلاحظ ان معظم ان لم يكن كل الانظمة العربية والاسلامية أنظمة مستبدة

Dr.Mohammed Gohary said...

هههههههههههههه
عارف مش هيسيب الكرسي ليه
عشان الكرسي لزق
هههههههههههههههههههههه
تحياتي موضوع شديد فكرني بواحد صاحبنا في عز شبابه ربنا يخليهولنا ويخلي جميع الزعماااااااااء
اللهم خد كل الشعوووووب في يوم واحد ياشيخ
عشان الصبح الرؤساء مايلاقوش حد يحكموه يجيبو عقد عمل ويروحو السعودية بقا اللي عايز مراوح يجيب واللي عايز خلاليط يجيب ههههه علي رأي عادل امام

بالنسبه لموضوع البوست خير ما عملت انك غيرته عارف لو كنت عملته زي ما كنت بتقول والالف واللام متشافوش
يا خرااااااابي عاللي كان هيحصلك كنت هتتخيط يا معلم كنت هتبقي اللي طلع اشاعة ان الريس عيااان
ألف سلامة علي الريس
ربنا يخليهولنا ويخلي جميع الزعمااااااء

قليل من التفكير said...


دكتور محمد
أهلا بك يا باشا ومنور

متهيقلي الرؤساء دول مع انهم مصلعين عين ام السعوب بس اكيد قبل ما يناموا بيدعوا ربنا ان الشعوب من كتر ما بيعملوه فيها متمتش ولا يجلها شلل ولا حاجة.... لحسن كده مش هيلاقوا حد يحكموه ويزهقزه ويقرفوه...الخ الخ

بس هو أنت بتدعي لمبارك بجد ولا ايه

Dr.Mohammed Gohary said...

اله طب وليه الاحراج ده
ماهو اكيد مفهوم اني بدعي للريس
اكيـــــــــــــــد


كنا هنروح في داهيه ياليل لكن ربنا سترررررر
ههههههه علي رأي عبد المنعم مدبولي

قليل من التفكير said...


ربنا يستر دايما ان شاء الله

عايش... ولكن !!!! said...

بل ما تبصى على بره بصى على اللى لازقلنا هنا
ولا ايه

Ahmed Al-Sabbagh said...

عنوان التدوينة كان رئيس بالعافية .. بس خفت لحسن الالف واللام ما يتشافوش واتاخد في أبو نيكلة بتهمة الاضرار بلاقتصاد والبورصة وتشويه سمعة مصر ومساعدة الهكسكوس في دخول مصر

هههههههههههههه
هههههههههههه
يخرب عقلك

قليل من التفكير said...


أحمد الصباغ

وبتدعي عليا ليه بس
:)

تحياتي لك